Pse po mbeten mesatarisht gjysma e dhomave të hoteleve të lira në kulmin e fluksit turistik të korrikut?

Turizmi në Shqipëri ka vijuar trajektoren rritëse edhe gjatë muajit korrik, duke u pasqyruar jo vetëm në hyrjet e shtetasve të huaj në kufi, por edhe në një rritje të qëndrueshme të kërkesës në strukturat zyrtare akomoduese. Sipas të dhënave më të fundit nga Instituti i Statistikave (INSTAT), numri i vizitorëve që kanë zgjedhur të akomodohen në hotele dhe struktura të ngjashme u rrit me 15.2% krahasuar me të njëjtën periudhë të vitit të kaluar. Ky zhvillim tregon se Shqipëria po arrin ta përkthejë popullaritetin e saj mediatik në net-qëndrime konkrete, ndonëse shpërndarja gjeografike dhe shfrytëzimi i kapaciteteve paraqesin nuanca të rëndësishme për t'u analizuar.

Sipas INSTAT, rritja e fluksit mbështetet kryesisht nga vizitorët jorezidentë, të cilët shënuan një rritje prej 18.3%, ndërsa numri i vizitorëve rezidentë (shqiptarë) u rrit me një hap më të moderuar prej 6.4%. Një e dhënë inkurajuese për operatorët turistikë është edhe rritja e net-qëndrimeve me 14% në total, ku për vizitorët e huaj ky tregues u rrit me 17.3%, ndërsa për rezidentët me 4.4%. Gjatë korrikut, hotelet dhe strukturat e ngjashme pritën 622,660 vizitorë të huaj (nga 526,302 në të njëjtin muaj të vitit të kaluar) dhe 193,903 vizitorë rezidentë.

Nga pikëpamja gjeografike, zonat bregdetare mbeten motori kryesor i sezonit veror, duke pritur 478,083 vizitorë të huaj dhe 151,042 rezidentë. Megjithatë, performanca rajonale tregon se Veriu po regjistron ritmet më të larta të rritjes së vizitorëve të huaj me 28.7%, i ndjekur nga Jugu me 18.5% dhe Rajoni Qendër me 9.3%. Sa i përket tregjeve të origjinës, Kosova vazhdon të mbajë peshën kryesore me 18% të vizitorëve të huaj, e pasuar nga Italia me 13%, Polonia me 11%, Franca me 7% dhe Gjermania me 6%.

Analiza e Alb.Markets

Përtej shifrave pozitive të rritjes vjetore, performanca e korrikut nxjerr në dritë disa aspekte strukturore që kërkojnë vëmendje nga investitorët dhe politikëbërësit. E dhëna më domethënëse është norma e shfrytëzimit të dhomave, e cila arriti në 55.3% nga 52.9% që ishte një vit më parë. Ndonëse kemi një përmirësim prej 2.4 pikë përqindjeje, kjo shkallë shfrytëzimi në muajin korrik — që konsiderohet kulmi i sezonit veror — mbetet relativisht e ulët për një destinacion që pretendohet se është i mbingarkuar.

Kjo diferencë mes fluksit të lartë të raportuar në pikat kufitare dhe shfrytëzimit mesatar të dhomave në hotelet zyrtare mund të shpjegohet me dy faktorë kryesorë. Së pari, rritja e jashtëzakonshme e kapaciteteve akomoduese joformale, si apartamentet me qira ditore (përmes platformave si Airbnb dhe Booking) të cilat shpesh nuk pasqyrohen plotësisht në statistikat zyrtare të hoteleve. Së dyti, një pjesë e madhe e vizitorëve mund të jenë tranzit ose me qëndrime shumë të shkurtra.

Një tjetër element që meriton vëmendje është rënia e vizitorëve rezidentë në zonat jo-bregdetare, të cilët ranë në 42,861 nga 51,166 në vitin e kaluar. Kjo sugjeron se rritja e kostove të jetesës dhe shtrenjtimi i shërbimeve mund të jenë duke frenuar turizmin e brendshëm drejt zonave malore ose historike gjatë muajve të nxehtë, duke i orientuar pushuesit vendas vetëm drejt bregdetit ose jashtë vendit.

Në këndvështrimin tonë, për të garantuar një turizëm të qëndrueshëm dhe me vlerë të lartë të shtuar, Shqipëria duhet të fokusohet në rritjen e normës së shfrytëzimit të kapaciteteve ekzistuese dhe në zgjatjen e sezonit përmes turizmit kulturor dhe të organizuar, i cili, siç vërehet edhe nga turoperatorët, performon më mirë gjatë pranverës dhe vjeshtës.